पुणे : ‘गेल्या सव्वा वर्षाच्या काळात वस्तू व सेवा कर (जीएसटी) आणि रिअल इस्टेट रेग्युलेटरी अ‍ॅथॉरिटी (रेरा) या दोन्ही कायद्याची अंमलबजावणी बऱ्याच अंशी यशस्वी झाली आहे. यामध्ये लेखापाल (सीए) आणि कर सल्लागार यांनी घेतलेली मेहनत महत्त्वाची आहे. या दोन्ही कायद्यात काही अडचणी येत आहेत. त्यासाठी येत्या काळात त्यामध्ये सुधारणा करून जीएसटी अधिक सुलभ करण्यासाठी आम्ही प्रयत्नशील आहोत,’ असे प्रतिपादन केंद्रीय ‘जीएसटी’ विभागाचे अतिरिक्त महासंचालक राजेश पांडे यांनी केले.
दी इन्स्टिट्यूट ऑफ चार्टर्ड अकाँटंट्स ऑफ इंडिया (आयसीएआय) पुणे विभाग व दी वेस्टर्न महाराष्ट्र टॅक्स प्रॅक्टिशर्न्स असोसिएशन (डब्ल्यूएमटीपीए) पुणे यांच्या संयुक्त विद्यमाने ‘जीएसटी आणि रेरा’ या विषयावरील ‘ज्ञानसंगम २०१८’ या एक दिवसीय परिसंवादाचे आयोजन कार्यात आले होते. त्या वेळी पांडे बोलत होते. पुणे स्टेशनजवळील हॉटेल शेरेटॉन ग्रँड येथे झालेल्या या कार्यक्रमाला पुणे ‘आयसीएआय’च्या उपाध्यक्षा व ‘ज्ञानसंगम २०१८’च्या प्रमुख समन्वयक सीए ऋता चितळे, ‘डब्ल्यूएमटीपीए’चे माजी अध्यक्ष नरेंद्र सोनवणे, अध्यक्ष नवनीतलाल बोरा, 'आयसीएआय'चे सचिव राजेश अग्रवाल, खजिनदार अभिषेक धामणे, अॅड. मिलिंद भोंडे आदी मान्यवर उपस्थित होते.
पांडे म्हणाले, ‘जीएसटी आणि ‘रेरा’ या कायद्यांत सतत बदल करावे लागत आहेत. हे बदल स्वीकारून कर सल्लागार, सीए आणि करदाते यांनी एकत्रितपणे यशस्वी करण्यासाठी प्रयत्न करावेत. राज्य आणि केंद्र सरकारतर्फे अशा संस्थांना बरोबर घेऊन ‘जीएसटी’तील बदलांची माहिती लोकांपर्यंत पोहोचवण्याचा प्रयत्न केला जावा. कर भरणाऱ्यांनी वेळेत कर भरावा. आधी दिरंगाई होते आणि मग तारखा वाढवून द्याव्या लागतात. त्याचा अतिरिक्त ताण यंत्रणेसह सगळ्यांवरच पडतो.’
‘कर सल्लागारांनी करदात्याची सगळी दुःखे आपल्या खांद्यावर घेऊन त्यांना उद्योग वृद्धीसाठी लक्ष केंद्रित करण्यास वेळ द्यावा. त्यासाठी कायद्यातील बदलांचे ज्ञान आपण घेऊन त्याप्रमाणे त्याची अंमलबजावणी करावी. येत्या काळात सर्वांकडून अभिप्राय मागवून ‘जीएसटी’मध्ये आणखी बदल केले जातील. जेणेकरून जीएसटी ‘गुड अँड सिंपल टॅक्स’ बनेल आणि करप्रणाली अधिक सुकर होईल,’ असेही पांडे यांनी नमूद केले.
परिसंवादात ‘जीएसटी’ व ‘रेरा’ यासंदर्भातील नवीन कायदे समज गैरसमज, यादरम्यान येणारा मानसिक ताणतणाव यावर मार्गदर्शन सत्रे झाली. यामध्ये सीए केल्विन शहा यांनी ‘वार्षिक कर परतावा आणि जीएसटी ऑडिट’, ज्ञानवत्सल स्वामी यांनी ‘ताणतणाव व्यवस्थापन’, तर अॅड. रतन शामल यांनी ‘रेरा : पुनर्विकासातील अडचणी’ या विषयावर मार्गदर्शन केले. या वेळी झालेल्या चर्चासत्रात अॅड. मिलिंद भोंडे, अॅड. अभय बोरा, सीए प्राजक्ता शेट्ये-देव व सीए यश नागर यांनी सहभाग घेतला.
नवनीतलाल बोरा यांनी मनोगत व्यक्त केले. नरेंद्र सोनावणे यांनी स्वागत-प्रास्ताविक केले. सीए ऋता चितळे यांनी परिसंवादाच्या आयोजनामागील भूमिका स्पष्ट केली. अॅड. भोंडे यांनी आभार मानले.
